Friday, January 26, 2007

معرض الكتاب مغلق للصلاة



النهاردة و لأول مرة أتجرأ و أروح لوحدي معرض الكتاب و ذلك لكي أستمع لتقديم كتاب تقوم به إحدي الصديقات، وصلت الساعة اتناشر وربع عند شباك التذاكر الذي كان يغلق ابوابه و دار هذا الحوار :

- الشاب اللي عل الشباك : اسف ما فيش بيع تذاكر ، تعالوا بعد الصلاة

- أنا : يا سيدي اديني تذكرة فيه ميعاد ندوة ،

- هو : حتي لو اديتلك تذكرة الأبواب قفلت !!!!! (أبواب المعرض!!!!) ، البيع و الشراء حرام وقت الصلاة !!!!! بعد الصلاة

- أنا : يعني بعد اد ايه ؟

- هو : بعد الصلاة يا هانم.

- انا : أنا ما بصليش الجمعة و معرفش ارجعلك امتي.

- هو طبعا لم يعجبه تعليقي و تطاير الشرر من عينيه، خلاص قفلنا انتم مش مسلمين ولا ايه !!!!


طبعا مشيت في منتهي الضيق و الحزن علي المستوي اللي وصلنا له، و كل اللي كنت بافكر فيه بيع ايه و شرا ايه هو انا داخلة اشتري من التوحيد و النور و لا انا فين بالظبط

9 comments:

karakib said...

غريب الكلام ده أوي !

karakib said...

شيء غريب

Desert Rose said...

This really is weired, i just hope it doesn't continue like that ..

Amanie F. Habashi said...

كنت مستانية البوست بتاعك

بصراحة مش عارفة إذا كان غريب ولا عادي!!!! محصلش الموضوع ده معانا قبل كده في المعرض لكن كل شيء بيتغير

Doaa Samir said...

عادي.. عادي
افتكرت أغنية أصالة "عادي".. أنا رحت المعرض مرتين، التانية كانت في اليوم الأخير.. وبقيت ماشية أنا وصاحبتي ومش قادرة أستوعب دهشتي وعمالة أسألها إنت متأكدة إننا في معرض الكتاب؟ لأن اللي معروض كانت لعب وزمامير والـ3شرابات بعشرة جنيه ومين يقرب

3lool said...

معرض الكتاب اصبح مجرد شارع لفسحه العائلات لا اكثر ولا اقل

وبعدين لما التدين حط عليهم بالشكل ده ممكن اعرف ليه دخلت مسجد القوات المسلحه اللي امام المعرض مباشره اكتر من مره وفي اكتر من صلاه وكان فااااااضي ومش لاقي حد يكمل الصف لصلاه الجماعه

صحيح بلد عجيبه وكل اللي فيها غريب

Unknown said...

i wanted to sing the Gasmy late song about egypt , I think it matches what you are saying

دينا فهمي said...

أنا ماحصلش معايا حاجة زي كده وأول مرة أسمع عن الموقف ده
بس بصراحة
محترمة الموقف جدا
ومش عارفة ليه حضرتك متدايأة منه
فعلا الموضوع ده من الدين
والصح اننا مانشتريش حاجة وقت صلاة الجمعة
صحيح البلد مقصرة في حاجات كتير جدا في الدين
بس مش مشكلة لما يعملوا حاجة صح نقف معاهم مش ضدهم

Randomly said...

للعلم. عرفت بعد الموضوع دة انه دي كانت مجرد حجة علشان يقللوا عدد الزوار ساعة صلاة الجمعة لأسباب أمنية، يعني المواضيع كلها داخلة في بعضها