Wednesday, June 21, 2006

نكتة

هي نكتة قديمة بس إفتكرتها اليومين دول

مرة الريس عايز يزود شعبيته فقال لرئيس الوزراء يعلي الأسعار فالناس تتضايق
يقوم هو ينزلها, فعلا رئيس الوزراء زود الأسعار, بس الناس ما اتكلمتش, عادي
خالص,
الريس استغرب قوي, وقاله: طب خلي الضرايب على المرتبات خمسين للمية. زود
رئيس الوزراء الضرايب خمسين فى المية, الناس هزت دماغها وسكتت.
الريس اتجنن وقال لرئيس الوزرا بص, طلع أي قرار غشيم من عندك يخلي البلد
تولع, رئيس الوزرا عمل ضريبة اللي يعدي كوبري يدفع عشرة جنيه, الناس نفخت و
ضربت كف بكف ودفعوا,
فقام رئيس الوزرا خلى اللي يعدي يدفع عشرة جنيه وهو طالع, وعشرة جنيه وهو
نازل من الناحية التانية, الناس قالت اللهم طولك يا روح و أمرنا لله و دفعوا.
رئيس الوزرا كبرت فى دماغه, وأمر إن اللي يعدي بعد ما يدفع عشرة جنيه, و هو
خارج من الكوبري ياخد على قفاه, و نزل الريس بنفسه متنكر يتابع الموقف, الناس
تدفع وهية طالعة الكوبري عشرة جنيه, و عشرة جنيه و هية نازلة و تاخد على
قفاها وتمشي,
شوية و لقى واحد بيزعق و متضايق, وطى على ودنه قال له "مالك؟" قال له "حاجة
تقرف! أنا متعطل هنا بقالي خمس ساعات..ما ينفعش كدة ..لازم يزودوا الناس اللي
بتدينا على قفانا!!!!!!!!"

9 comments:

a h m a d said...

هذه النكتة تجعلني أتذكر حال العالم العربي اليوم في ظل الحكام الحاليين. المضحك المبكي

شكرا لمشاركتها

حـدوتـة said...

ياااه! كتر خيرك والله! أنا بقالي كام يوم بحاول افتكر النكتة دي مش فاكراها :)

egiziana said...

شكرا يا أحمد ويا حدوتة علي مشاركتكم.

beastboy said...

حاجة محزنة، وللأسف هو ده حالنا بجد :(

...دنيتي said...

هههههههههههههههههههه
جامدة اوي
انا اول مرة اسمعها
الظاهر انا اللي قديمة

Abdou Basha said...

بس دي مش نكتة
دي حقيقة
;)

egiziana said...

عبده باشا، للأسف انها مش نكتة،
دنيتي و beastboy فعلا هي قديمة و محزنة

Anonymous said...

بس أصل النكتة مش كده
في الآخر اللي بيطلع الكوبري مش بياخد على قفاه ، لأ بياخد فيها لمؤاخذة
والطلب الآخير أن يزيدوا من عدد الناس اللي بتدينا فيها
الأمانة التاريخية اقتضت التنويه

الحصان الأسود said...

هههههههههههه
ياااااااااااااة
دي قديمة قوي

عندي الجديد بس اخاف ابات عند اخواننا الحلوين لو انا كتبت النكت دي هنا